MWENGE WA UHURU WAKIMBIZWA NA KUKAGUA MIRADI MBALIMBALI YA MAENDELEO - NSIMBO DC

Imewekwa: September 25th, 2025

Mwenge wa Uhuru leo umekimbizwa takribani kilometa 91.4 ukikagua miradi mbalimbali ya maendeleo katika Halmashauri ya Wilaya ya Nsimbo Mkoani Katavi.

Katika mbio hizo za Mwenge wa Uhuru, Miradi kumi (10) yenye thamani ya jumla ya shilingi Bilioni 1.147 imekaguliwa, ambapo miradi mitatu imewekewa mawe ya msingi, miradi mitatu imezinduliwa, miradi miwili imefunguliwa na miradi miwili imekaguliwa na kuonwa.

Miradi iliyozinduliwa ni pamoja na mradi wa matumizi ya Nishati safi katika shule ya sekondari Nsimbo uliogharimu shilingi milioni 29, mradi wa kikundi cha vijana katika Kijiji cha Katisunga uliogharimu shilingi milioni 27 ambao ni mradi ulioanzishwa kupitia mkopo wa asilimi 10 kupitia mapato ya ndani. Mradi wa tatu uliozinduliwa ni mradi wa mapambano dhidi ya Lishe duni na Ukatili wa Kijinsia uliogharimu kiasi cha shilingi milioni 1.85.

Aidha, miradi miwili iliyofunguliwa ni mradi wa nyumba ya walimu (2 in 1) katika shule ya Sekondari Anna Lupembe uliogharimu kiasi cha shilingi milioni 110 na mradi wa nyumba ya madaktari (2 in 1) katika Zahanati ya Uruwira uliogharimu kiasi cha shilingi milioni 103.

Miradi iliyowekewa mawe ya msingi ni pamoja na mradi wa uchimbaji visima vitano katika Kijiji cha Kanoge namba 1 kilichopo Kata ya Nsimbo kupitia program ya visima 900 Tanzania ambapo hadi kukamilika kwake mradi huu utagharimu kiasi cha shilingi milioni 396.1, mradi wa ujenzi wa Daraja la Upinde wa Mawe katika Kijiji cha Ikondamoyo utakaogharimu kiasi cha shilingi milioni 244.46 pamoja na mradi wa kituo cha uuzaji wa mafuta cha Katisunga Oil kilichopo Kijiji cha Katisunga kata ya Machimboni ambapo hadi kukamilika kwake utagharimu kiasi cha shilingi milioni 236.

Pamoja na miradi hiyo ya maendeleo iliyotembelewa na Mwenge wa Uhuru, miradi miwili imekaguliwa na kuonwa ambayo ni Maandalizi ya uchaguzi mkuu 2025 na mradi wa mapambano dhidi ya UKIMWI, Malaria, Dawa za kulevya na Rushwa.

Kiongozi wa mbio za Mwenge wa Uhuru mwaka 2025 Ndugu Ismail Ali Ussi ameipongeza serikali Wilayani Mpanda kupitia kwa Mkuu wa Wilaya hiyo Mheshimwa Jamila Yusuph na Mkurugenzi wa Halmashauri ya Wilaya ya Nsimbo Bi. Christina Bunini kwa usimamizi mzuri wa miradi mbalimbali ya maendeleo inayotekelezwa katika Halmashauri ya Wilaya ya Nsimbo.

Mwenge wa Uhuru umehitimisha mbio zake katika Halmashauri ya Wilaya ya Nsimbo ambapo miradi yote iliyopitiwa imepongezwa kwa ukamilifu wake katika hatua zilizofikiwa.

Baada ya kukamilika kwa ratiba yake katika Halmashauri ya Wilaya ya Nsimbo, mwenge wa Uhuru kesho utasafiri takribani kilometa 138 kabla ya kupokelewa na kukimbizwa katika Halmashauri ya Wilaya ya Mlele Mkoani Katavi.